Maus. Art Spiegelman

Cada vez os cómics atráenme máis, e ata me sorprendo pensando nas ganas que teño de ter o seguinte exemplar nas miñas mans, e cal será o próximo que escollerei?. Son dinámicos, divertidos, apenas existen as descripcións pero no canto temos a imaxe. Non dan tanta cabida á imaxinación como os libros, pero aliméntannos de creatividade.

Maus é unha historia que todas as persoas deberían ler (se eu gobernara había de crear unha nova lei que o obligase), e incluso se debería facer dúas veces na vida. A primeira vez para coñecer a historia e a segunda para repasar, non vaia a ser que se nos pasara calquera detalle, que sen dúbida sería un desperdicio.

Maus conta a vida de supervivintes do holocausto nazi cunha metáfora. Relata unha historia real, de maltrato e de solidariedade, de odio e de amor, de amigos e de inimigos, de morte e de vida, de violencia e de paz, de gatos e ratos...todo misturado con humor, co humor de quen viviu tantas desgracias e penurias q valora infinitamente as cousas máis pequenas. As feridas deixan cicatriz, pero curten a pel.

Estaría ben que as relixións cambiaran os seus catecismos e outras trapalladas por libros coma este, que realmente serven para facer exames de conciencia e reflexións sobre ética. O problema é que igual non convén, non vaia a ser que se destapen algúns trapos sucios de apoios a masacres humanas, guerras e outras lindezas polo intercambio intereses.